ஹைதராபாத் அணிக்கு அதிர்ச்சி: கம்மின்ஸ் அவுட் – இஷான் கிஷன் கேப்டன், அபிஷேக் சர்மா துணை!

2026 ஐபிஎல் தொடர் நெருங்கும் நிலையில், சன்ரைசர்ஸ் ஹைதராபாத் அணியில் எதிர்பாராத மாற்றம் அறிவிக்கப்பட்டுள்ளது. அணியின் நிரந்தர கேப்டனான Pat Cummins காயம் காரணமாக தொடக்கப் போட்டிகளில் விளையாட முடியாத நிலை ஏற்பட்டுள்ளது. இதையடுத்து, விக்கெட் கீப்பர்-பேட்ஸ்மேன் Ishan Kishan தற்காலிக கேப்டனாக நியமிக்கப்பட்டுள்ளார்.

கம்மின்ஸ் முதுகு வலி பிரச்சனையிலிருந்து இன்னும் முழுமையாக மீளாததால், குறைந்தபட்சம் முதல் மூன்று போட்டிகளில் அவர் பங்கேற்கமாட்டார் என தகவல்கள் வெளியாகியுள்ளன. அவர் திரும்பும் வரை, இஷான் கிஷன் அணியை வழிநடத்துவார். அதே நேரத்தில், இளம் ஆல்-ரவுண்டர் Abhishek Sharma துணை கேப்டனாக பொறுப்பேற்கிறார்.

சன்ரைசர்ஸ் ஹைதராபாத் அணி தனது முதல் போட்டியை மார்ச் 28ஆம் தேதி நடப்பு சாம்பியன் அணியான ராயல் சேலஞ்சர்ஸ் பெங்களூருவுக்கு எதிராக விளையாட உள்ளது. அதன் பின்னர் கொல்கத்தா நைட் ரைடர்ஸ் மற்றும் லக்னோ சூப்பர் ஜெயண்ட்ஸ் அணிகளுடன் மோதும் அட்டவணையும் உள்ளது.

கம்மின்ஸ் தலைமையில் அணிக்கு முந்தைய சீசனில் கிடைத்த வெற்றிகள் இருந்தாலும், இப்போது புதிய தலைமையின் கீழ் அணி எப்படி செயல்படும் என்பது கவனிக்கத்தக்கதாக உள்ளது.

ஐபிஎலில் நூற்றுக்கும் மேற்பட்ட போட்டிகளில் அனுபவம் கொண்ட இஷான் கிஷன் சமீபத்தில் சிறந்த ஃபார்மில் உள்ளார். சையத் முஷ்டாக் அலி தொடரில் ஜார்கண்ட் அணியை சாம்பியன் பட்டத்துக்கு கொண்டு சென்ற அனுபவம், SRH அணிக்கும் பலன் அளிக்குமா என்ற எதிர்பார்ப்பு ரசிகர்களிடையே அதிகரித்துள்ளது.