இலங்கை டெஸ்ட் தொடரில் இருந்து சாய் சுதர்சன் விலகல் - இந்திய அணிக்கு அடுத்த பின்னடைவு; மாற்று வீரர் யார்?
இலங்கைக்கு எதிரான இரு போட்டிகள் கொண்ட டெஸ்ட் தொடரில் இருந்து இந்திய டாப் ஆர்டர் பேட்ஸ்மேன் சாய் சுதர்சன் கால் விரல் காயம் காரணமாக விலகியுள்ளார்.
இலங்கைக்கு எதிரான இரு போட்டிகள் கொண்ட டெஸ்ட் தொடரில் இருந்து இந்திய அணியின் டாப் ஆர்டர் பேட்ஸ்மேன் சாய் சுதர்சன் காயம் காரணமாக விலகியுள்ளார். இந்திய அணிக்கு இது மேலும் ஒரு பின்னடைவாக அமைந்துள்ளது.
ஏனெனில், ஏற்கனவே இந்திய அணியின் முன்னணி வேகப்பந்து வீச்சாளரான ஜஸ்ப்ரீத் பும்ரா காயம் காரணமாக இந்தத் தொடரிலிருந்து விலகியிருந்தார். பும்ராவுக்குப் பதிலாக ஜம்மு காஷ்மீரைச் சேர்ந்த இளம் வேகப்பந்து வீச்சாளர் ஆகிப் நபி அணியில் இடம்பெற்றுள்ளார்.
இலங்கை சுற்றுப்பயணத்திற்கான இந்திய அணி அறிவிக்கப்பட்ட போதே சாய் சுதர்சனின் உடல்தகுதி குறித்து கேள்விகள் எழுந்திருந்தன. இந்திய 'ஏ' அணி சார்பாக இலங்கையில் சமீபத்தில் நடந்த தொடரில் அவர் 132, 168 உள்ளிட்ட அபார ரன்களை குவித்திருந்தார்.
ஆனால், அந்த சுற்றுப்பயணத்தின் போதே அவரது கால் பெருவிரலில் ஏற்பட்ட அழுத்த முறிவு (toe stress fracture) காயம் தீவிரமடைந்தது. பிசிசிஐ மையத்தில் மறுவாழ்வு சிகிச்சை பெற்று வந்த போதிலும், முதல் டெஸ்டுக்கு முன்னதாக அவர் முழுமையாக குணமடையவில்லை. இதனால், ஆகஸ்ட் 15 ஆம் தேதி காலேவில் தொடங்கவிருக்கும் டெஸ்ட் தொடரில் அவர் விளையாட முடியாது என அதிகாரப்பூர்வமாக உறுதி செய்யப்பட்டுள்ளது.
சாய் சுதர்சன் இந்தத் தொடரில் இடம்பெறவில்லை என்றாலும், அவருக்குப் பதிலாக யார் இந்திய அணியில் இடம்பெறுவார் என்பது குறித்து இன்னும் அதிகாரப்பூர்வ அறிவிப்பு எதுவும் வெளியாகவில்லை. இருப்பினும், பல்வேறு ஊடக அறிக்கைகளில் மாற்று வீரருக்கான பட்டியல் வெளியாகியுள்ளது.
அதில் மும்பையின் சர்ஃபராஸ் கான் மற்றும் ஆந்திராவின் ஷேக் ரஷீத் ஆகியோர் முன்னிலை வகிப்பவர்களாக கூறப்படுகிறது. குறிப்பாக, சர்ஃபராஸ் கான் தான் முன்னணி வேட்பாளராக கருதப்படுகிறார். இந்நிலையில், இலங்கை லெவன் அணிக்கு எதிரான பயிற்சி ஆட்டத்தில் நம்பர்-3 இல் களமிறங்கி சதம் விளாசிய தேவ்தத் படிக்கலும் வலுவான போட்டியாளராக உருவெடுத்துள்ளார்.
இந்திய அணியின் கேப்டன் ஷுப்மன் கில் கூட பயிற்சியின் போது வலது கை மோதிர விரலில் காயம் அடைந்ததால், பயிற்சி ஆட்டத்தில் பங்கேற்கவில்லை என்பது குறிப்பிடத்தக்கது.
இந்த காயங்களின் காரணமாக, இலங்கை டெஸ்ட் தொடர் இந்திய அணிக்கு கடினமான சவாலாக அமையும் என எதிர்பார்க்கப்படுகிறது. 2025-27 உலக டெஸ்ட் சாம்பியன்ஷிப்பில் இந்தியா தற்போது ஐந்தாவது இடத்தில் உள்ள நிலையில், இந்த தொடரில் வெற்றி பெறுவது மிகவும் அவசியமாகிறது.
