'துர்நாற்றத்தில்' வெளிப்பட்ட சிகாகோ பயங்கரம்: இறுதிச் சடங்கு மையத்தில் அழுகிய நிலையில் 57 உடல்கள்

அமெரிக்காவின் இலினாய்ஸ் மாகாணத்தில் உள்ள சிகாகோ நகரின் தென்கிழக்கு பகுதியில், சாதாரணமாக இயங்கி வந்த ஒரு இறுதிச் சடங்கு மையத்திற்குள் நடந்திருக்கக் கூடாத ஒரு பயங்கர சம்பவம் அம்பலமாகியுள்ளது. சிகாகோ நகரின் சவுத் டீரிங் பகுதியில், கிழக்கு 95வது தெருவில் அமைந்துள்ள 'சவுத் சிகாகோ சேப்பல்' (South Chicago Chapel) என்ற இறுதிச் சடங்கு மையத்தில், 50 க்கும் மேற்பட்ட உடல்கள் அழுகிய நிலையில் கண்டெடுக்கப்பட்டுள்ளன.

இந்த பயங்கர சம்பவம் வெளிச்சத்திற்கு வந்தது, அந்தப் பகுதி மக்கள் நீண்ட காலமாக அந்த இறுதிச் சடங்கு மையத்திலிருந்து வீசிய துர்நாற்றம் குறித்து நகர நிர்வாகத்திற்கு புகார் அளித்ததைத் தொடர்ந்தே. இதையடுத்து, இல்லினாய்ஸ் மாநில நிதிக் கட்டுப்பாட்டாளர் சூசானா மென்டோசாவின் அலுவலகம் மற்றும் குக் கவுண்டி மருத்துவ பரிசோதகரின் அலுவலகம் இணைந்து நடத்திய ஆய்வில், இந்த இறுதிச் சடங்கு மையத்தில் முறையான பராமரிப்பு மற்றும் குளிர்சாதன வசதிகள் எதுவும் இல்லாமல், 57 உடல்கள் பல்வேறு அளவுகளில் அழுகிய நிலையில் இருந்தது கண்டுபிடிக்கப்பட்டுள்ளது.

இந்த அதிர்ச்சிகரமான கண்டுபிடிப்பிற்குப் பிறகு, சிகாகோ போலீசார் மற்றும் குக் கவுண்டி மருத்துவ பரிசோதகர் குழுவினர் சம்பவ இடத்தில் தீவிர விசாரணையில் ஈடுபட்டுள்ளனர். மருத்துவ பரிசோதகர் அலுவலகம், இந்த உடல்களை அடையாளம் காணும் பணியில் தீவிரமாக ஈடுபட்டுள்ளது. இறப்பு சான்றிதழ்கள் மற்றும் பதிவுகளை ஆராய்ந்து, இந்த உடல்கள் யாருடையது என்பதை கண்டறிந்து, அவர்களின் குடும்பத்தினருக்கு தகவல் தெரிவிக்கும் பணி பல நாட்கள் ஆகலாம் என தெரிவிக்கப்பட்டுள்ளது.

இந்த சம்பவத்தின் மையத்தில் இருக்கும் இறுதிச் சடங்கு மையத்தின் உரிமையாளர்கள், கிளார்க் மோர்கன் மற்றும் ஜொஹான்னா மோர்கன் தம்பதியினர். இவர்கள் ஏற்கனவே 'ஹைட்ஸ் கிரிமேட்டரி' (Heights Crematory) என்ற தகன மையத்தை நடத்தி வந்ததாகவும், அங்கும் இதே போன்ற முறைகேடுகள் நடந்ததால், அந்த மையத்தின் உரிமம் கடந்த ஆண்டு ரத்து செய்யப்பட்டதாகவும் தகவல்கள் வெளியாகியுள்ளன. அந்த தகன மையத்தில், உடல்கள் சரியான முறையில் பாதுகாக்கப்படாமல் இருந்ததோடு, தகனம் செய்யப்பட்ட சாம்பல்கள் கூட உறவினர்களிடம் முறையாக ஒப்படைக்கப்படாமல் இருந்துள்ளன.

இந்த பயங்கர சம்பவம் குறித்து இல்லினாய்ஸ் மாநில நிதிக் கட்டுப்பாட்டாளர் சூசானா மென்டோசா கடும் வேதனை தெரிவித்துள்ளார். "இதே நபர்கள் மீண்டும் இதே கோரமான செயலைச் செய்திருப்பது மிகவும் வேதனையளிக்கிறது" என்று அவர் கூறியுள்ளார். இந்த தம்பதியினரின் இறுதிச் சடங்கு இயக்குனர் உரிமங்கள் தற்காலிகமாக ரத்து செய்யப்பட்டுள்ளன. கிளார்க் மோர்கனின் உரிமம் ஏற்கனவே 2024 ஆம் ஆண்டிலேயே காலாவதியான உரிமத்துடன் பணியாற்றியதற்காக ரத்து செய்யப்பட்டிருந்தது குறிப்பிடத்தக்கது.

இந்த சம்பவத்தில் இதுவரை யாரும் கைது செய்யப்படவில்லை என்றாலும், சிகாகோ போலீஸ் துறையினர் தீவிர விசாரணையை மேற்கொண்டு வருகின்றனர். இந்த சம்பவம், அமெரிக்காவில் இறுதிச் சடங்கு மையங்களின் மீதான கட்டுப்பாடுகள் மற்றும் ஆய்வுகள் குறித்த பெரிய கேள்வியை எழுப்பியுள்ளது. இல்லினாய்ஸ் மாநிலத்தில், இறுதிச் சடங்கு மையங்கள் மற்றும் தகன மையங்கள் வெவ்வேறு அரசு நிறுவனங்களால் கட்டுப்படுத்தப்படுகின்றன. இதனால், இதுபோன்ற முறைகேடுகளை தடுப்பதில் சிக்கல்கள் உள்ளதாகவும், அனைத்து நிறுவனங்களையும் ஒரே அமைப்பின் கீழ் கொண்டு வர வேண்டிய அவசியம் உள்ளதாகவும் அதிகாரிகள் தெரிவித்துள்ளனர்.

மேலும், இந்த இறுதிச் சடங்கு மையத்தில் தங்கள் அன்புக்குரியவர்களின் உடல்கள் ஒப்படைக்கப்பட்டுள்ளதால், பல குடும்பங்கள் கடும் மன உளைச்சலில் உள்ளனர். தாங்கள் நினைத்தது போல தங்கள் உறவினர்களின் உடல்கள் முறையாக பாதுகாக்கப்பட்டு, மரியாதையுடன் நடத்தப்படவில்லை என்பதை அறிந்ததும், அந்த குடும்பங்கள் கொந்தளிப்பில் ஆழ்ந்துள்ளனர். ஒரு பெண் தனது சகோதரியின் உடல் இந்த இறுதிச் சடங்கு மையத்தில் இருந்ததா இல்லையா என்று கூட தெரியாமல் கவலையில் இருக்கிறார். இந்த சம்பவம், சிகாகோ நகரம் முழுவதும் பெரும் அதிர்ச்சியையும், கோபத்தையும் ஏற்படுத்தியுள்ளது.