அணி முடிவுகளில் தோனி தலையிடுவதில்லை: கேப்டன் ருதுராஜ் கெய்க்வாட் வெளியிட்ட அதிரடித் தகவல்!

இந்தியாவின் விளையாட்டுத் திருவிழாவான ஐபிஎல் கிரிக்கெட் தொடரின் 19-வது சீசன், மார்ச் 28-ம் தேதியான இன்று பிரம்மாண்டமாகத் தொடங்கியுள்ளது. இன்றைய தொடக்க ஆட்டத்தில் நடப்புச் சாம்பியன் ராயல் சேலஞ்சர்ஸ் பெங்களூரு மற்றும் சன்ரைசர்ஸ் ஹைதராபாத் அணிகள் மோதி வருகின்றன.

ஒருபுறம் போட்டிகள் சூடுபிடித்துள்ள நிலையில், மறுபுறம் சென்னை சூப்பர் கிங்ஸ் அணி தனது பயிற்சிகளைத் தீவிரப்படுத்தியுள்ளது. குறிப்பாக, கணுக்கால் காயம் காரணமாகத் தொடரின் முதல் இரண்டு வாரங்களுக்குத் தோனி விளையாட மாட்டார் என்ற செய்தி ரசிகர்களைச் சோகத்தில் ஆழ்த்தியுள்ள நிலையில், கேப்டன் ருதுராஜ் கெய்க்வாட் தோனி குறித்துப் பகிர்ந்துள்ள சில தகவல்கள் இணையத்தில் வைரலாகி வருகின்றன.

அணியின் ஆலோசனைக் கூட்டங்கள் மற்றும் திட்டமிடல்களில் தோனியின் பங்கு குறித்து ருதுராஜ் கெய்க்வாட் மனம் திறந்து பேசியுள்ளார். "தோனி மீது எனக்கு அளப்பரிய மரியாதை உண்டு. ஆனால், அவர் அணியின் விவாதங்களில் நேரடியாகத் தலையிடுவதைத் தவிர்க்கிறார்.

நானும் பயிற்சியாளர் ஸ்டீபன் பிளமிங்கும் தான் அணியை முன்னெடுத்துச் செல்ல வேண்டும் என்பதில் அவர் உறுதியாக இருக்கிறார். ஒரு சீனியர் வீரராக அவரிடம் ஆலோசனை கேட்டாலும், அதை அப்படியே பின்பற்ற வேண்டிய அவசியமில்லை; களத்தில் எங்களது சொந்த யோசனைகளின்படி அணியை வழிநடத்த வேண்டும் என்பதே அவரது விருப்பமாக உள்ளது," என்று ருதுராஜ் தெரிவித்துள்ளார்.

கேப்டனாகத் தனது தனித்துவத்தை வெளிப்படுத்தத் தோனி முழு சுதந்திரம் அளிப்பதாக ருதுராஜ் நெகிழ்ச்சியுடன் குறிப்பிட்டுள்ளார். "அணியின் நலனுக்காக எதையும் செய்யத் தயாராக இருக்கும் தோனி, தேவையான நேரங்களில் மட்டுமே தனது ஆலோசனைகளை வழங்குகிறார். மற்ற நேரங்களில் எங்களது முடிவுகளுக்கே முன்னுரிமை அளிக்கிறார்.

இது ஒரு கேப்டனாக எனக்கு மிகுந்த தன்னம்பிக்கையைத் தருகிறது," என அவர் கூறியுள்ளார். தோனி விளையாடாத முதல் சில போட்டிகளில், ருதுராஜ் தனது சொந்த வியூகங்களின்படி சிஎஸ்கேவை எப்படி வழிநடத்தப் போகிறார் என்பதைப் பார்க்க ரசிகர்கள் ஆவலுடன் காத்திருக்கின்றனர்.