6.5 கோடி ஆண்டுகள் பழமையான 'கஸ் டி-ரெக்ஸ்' டைனோசர் எலும்புக்கூடு ஏலத்திற்கு வருகிறது: ரூ.250 கோடிக்கு விற்பனையாக வாய்ப்பு!

அமெரிக்காவில் கண்டெடுக்கப்பட்ட வரலாற்றுச் சிறப்புமிக்க பிரமாண்ட டைனோசர் எலும்புக்கூடு ஒன்று, நியூயார்க்கில் நடைபெறவுள்ள சர்வதேச ஏலத்தில் பல நூறு கோடிகளுக்கு விற்பனையாகும் என எதிர்பார்க்கப்படுகிறது.

அமெரிக்காவின் தெற்கு டகோட்டாவில் உள்ள ஹார்டிங் கவுண்டி பகுதியில், கேரி கஸ் லிக்கிங் என்பவருக்குச் சொந்தமான பண்ணை நிலத்தில் ஹெல் க்ரீக் பாறை அடுக்குகள் அமைந்துள்ளன. தனது நிலத்தின் அடியில் ஏதோ வரலாற்றுப் புதையல் இருப்பதாக நம்பிய கேரி, கடந்த 2021-ம் ஆண்டு தொல்லியல் வல்லுநரான தாமஸ் ஹெய்ட்கேம்ப் மற்றும் அவரது குழுவினருடன் இணைந்து அகழ்வாராய்ச்சிப் பணிகளைத் தொடங்கினார். துரதிர்ஷ்டவசமாக, ஓராண்டு தேடலுக்குப் பிறகு கேரி கஸ் காலமானார்.

இருப்பினும், அவர் இறப்பதற்கு முன் சுட்டிக்காட்டிய 6500 ஏக்கர் பண்ண நிலத்தின் ஒரு குறிப்பிட்ட பகுதியில் அகழ்வாராய்ச்சி தொடர்ந்தது. அதன்படியே, கடந்த 2023-ம் ஆண்டில் சுமார் 38 அடி நீளமும், 12.5 அடி உயரமும் கொண்ட ஒரு பிரமாண்டமான டி-ரெக்ஸ் (T-Rex) வகை டைனோசரின் எலும்புக்கூடு கண்டுபிடிக்கப்பட்டது. இதுவரை உலகிலேயே கண்டெடுக்கப்பட்ட டைனோசர் எலும்புக்கூடுகளில் மிகவும் முழுமையான வடிவத்தைக் கொண்ட புதைபடிவங்களில் ஒன்றாக இது கருதப்படுகிறது.

தற்போது 2026-ம் ஆண்டில் இந்த எலும்புகள் அனைத்தும் முழுமையாகச் சுத்தம் செய்யப்பட்டு, காட்சிக்குத் தயாராக வைக்கப்பட்டுள்ளது. இந்த அரிய கண்டுபிடிப்புக்குக் காரணமான நிலத்தின் உரிமையாளரை கௌரவிக்கும் வகையில், இதற்கு “கஸ் டி-ரெக்ஸ்” (Gus T-Rex) என்று பெயரிடப்பட்டுள்ளது.

இந்த பிரமாண்ட எலும்புக்கூடு வருகின்ற ஜூலை 14-ம் தேதி மாலை 7.30 மணியளவில் நியூயார்க்கில் உள்ள புகழ்பெற்ற 'சோத்பீஸ்' (Sotheby's) நிறுவனம் மூலம் ஏலம் விடப்பட உள்ளது. இதன் ஆரம்ப விலை 19 லட்சம் அமெரிக்க டாலர்களாக நிர்ணயிக்கப்பட்டாலும், இதன் தொன்மை மற்றும் முழுமையான வடிவம் காரணமாக 20 முதல் 30 மில்லியன் (2 முதல் 3 கோடி) அமெரிக்க டாலர்கள் வரை ஏலம் போகலாம் என மதிப்பிடப்பட்டுள்ளது. இது இந்திய மதிப்பில் சுமார் 250 கோடி ரூபாய் ஆகும்.