இந்தியா - தென்னாப்பிரிக்கா கிரிக்கெட் தொடர் எப்போது துவங்கும்? எதில் பார்க்கலாம்..  முழு அட்டவணை

இந்தியா மற்றும் தென்னாப்பிரிக்கா (IND vs SA) அணிகளுக்கு இடையிலான கிரிக்கெட் தொடர் இந்தியாவில் கிட்டதட்ட ஒரு மாதத்திற்கும் மேலாக நடைபெற உள்ளது. இந்தத் தொடரில் இந்திய அணி 2 டெஸ்ட் போட்டிகள், 3 ஒருநாள் (ODI) போட்டிகள் மற்றும் 5 டி20 போட்டிகளில் பங்கேற்க உள்ளது.  2019ஆம் ஆண்டிற்குப் பிறகு இந்த இரண்டு அணிகளும் டெஸ்ட், ஒருநாள், டி20 என மூன்று ஃபார்மெட்களிலும் விளையாடுவது இதுவே முதல் முறையாகும்.

இந்தத் தொடர் முதலில் 2 போட்டிகள் கொண்ட டெஸ்ட் தொடருடனும், அதைத் தொடர்ந்து 3 போட்டிகள் கொண்ட ஒருநாள் தொடருடனும், கடைசியாக 5 போட்டிகள் கொண்ட டி20 தொடருடனும் நடத்தப்படவுள்ளது. 

அடுத்த ஆண்டு பிப்ரவரி மாதத்தில் டி20 உலகக் கோப்பை 2026 தொடர் இந்தியாவில் துவங்க உள்ளதால், டி20 தொடர் மட்டும் 5 போட்டிகள் கொண்ட நீண்ட தொடராக நடத்தப்படுகிறது.

போட்டிகளின் அட்டவணை (தேதி மற்றும் இடங்கள்):

டெஸ்ட் தொடர்: இரண்டு போட்டிகள் கொண்ட டெஸ்ட் தொடரில், முதல் டெஸ்ட் போட்டி நவம்பர் 14 முதல் 18ஆம் தேதி வரை கொல்கத்தாவில் நடைபெறும். இரண்டாவது டெஸ்ட் போட்டியானது நவம்பர் 22ஆம் தேதி முதல் 26ஆம் தேதி வரை கௌகாதியில் நடைபெறும். இரண்டு டெஸ்ட் போட்டிகளும் இந்திய நேரப்படி காலை 9:30 மணிக்குத் துவங்கும்.

ஒருநாள் தொடர்: மூன்று போட்டிகள் கொண்ட ஒருநாள் தொடரின் முதல் போட்டி நவம்பர் 30ஆம் தேதி ராஞ்சியில் நடைபெறும். இரண்டாவது ஒருநாள் போட்டி டிசம்பர் 30ஆம் தேதி ராய்பூரில் நடைபெறும். மூன்றாவது மற்றும் கடைசி ஒருநாள் போட்டி டிசம்பர் 6ஆம் தேதி விசாகப்பட்டினத்தில் நடைபெற உள்ளது. இந்த மூன்று ஒருநாள் போட்டிகளும் இந்திய நேரப்படி பகல் 1:30 மணிக்குத் துவங்கும்.

டி20 தொடர்: 5 போட்டிகள் கொண்ட டி20 தொடரின் முதல் போட்டி டிசம்பர் 9ஆம் தேதி கட்டாக்கில் நடைபெறுகிறது.

இரண்டாவது போட்டி டிசம்பர் 11ஆம் தேதி சண்டிகாரில் நடைபெறும்.

3ஆவது போட்டி டிசம்பர் 14ஆம் தேதி தர்மசாலாவில் நடைபெறும்.

4ஆவது போட்டி டிசம்பர் 17ஆம் தேதி லக்னோவில் நடைபெற உள்ளது.

5ஆவது மற்றும் கடைசிப் போட்டி டிசம்பர் 19ஆம் தேதி அகமதாபாத்தில் நடைபெறுகிறது.

இந்தியா மற்றும் தென்னாப்பிரிக்கா இடையிலான இந்தத் தொடரை ஸ்டார் ஸ்போர்ட்ஸ் நிறுவனம் ஒளிபரப்ப உள்ளது. மேலும், இந்தத் தொடரை ஜியோ ஹாட் ஸ்டார் ஆப் மூலம் ஆன்லைனிலும் காண முடியும்.

இந்திய மண்ணில் தென்னாப்பிரிக்கா தொடர்களின் வரலாறு

2022 தொடர்: தென்னாப்பிரிக்க அணி கடைசியாக 2022ஆம் ஆண்டில்தான் இந்தியாவுக்கு வருகை தந்தது. அப்போது நடைபெற்ற மூன்று போட்டிகள் கொண்ட டி20 தொடரை, இந்தியா 2-1 என்ற கணக்கில் கைப்பற்றியது. அந்தத் தொடரின் கடைசி போட்டியில் மட்டுமே தென்னாப்பிரிக்க அணி வெற்றி பெற்றது.

தொடர்ந்து நடந்த மூன்று போட்டிகள் கொண்ட ஒருநாள் தொடரில், தென்னாப்பிரிக்க அணி முதல் போட்டியில் வென்றது. ஆனால், அடுத்து வந்த கடைசி இரண்டு போட்டிகளிலும் இந்திய அணி வெற்றி பெற்று, ஒருநாள் தொடரையும் தன்வசப்படுத்தியது.

2019-2020 தொடர்: தென்னாப்பிரிக்க அணி 2019ஆம் ஆண்டில் இந்தியா வந்தபோதுதான், கடைசியாக டெஸ்ட் தொடரில் பங்கேற்றது. அப்போது நடைபெற்ற மூன்று போட்டிகள் கொண்ட டெஸ்ட் தொடரில், இந்திய அணி 3-0 என்ற கணக்கில் மிக பிரம்மாண்டமான வெற்றியைப் பெற்றது.

அப்போது நடத்தப்பட்ட மூன்று போட்டிகள் கொண்ட டி20 தொடரானது 1-1 என்ற கணக்கில் சமன் ஆனது. அந்தத் தொடரின் முதல் போட்டி மழை காரணமாக ரத்து செய்யப்பட்டது. அடுத்து திட்டமிடப்பட்ட மூன்று போட்டிகள் கொண்ட ஒருநாள் தொடரில், முதல் போட்டி மழையால் ரத்தானது. மீதமிருந்த கடைசி இரண்டு போட்டிகளும் கொரோனா (COVID-19) காரணமாக முழுமையாக ரத்து செய்யப்பட்டன.

நாட்டு நடப்புகளை உங்கள் அலைபேசியில் பெற்றுக்கொள்ள Colomboதமிழ் WHATSAPP மற்றும் GOOGLE NEWS பக்கத்தில் இணையுங்கள்.

WHATSAPP CHANNEL GOOGLE NEWS