ஹோமரின் காவியத்திற்கு நோலன் அளித்த புதிய வடிவம்: 'தி ஒடிஸி' முதல் விமர்சனம்

கிறிஸ்டோபர் நோலன் என்றாலே திரை உலகிற்கு ஒரு புதிய பரிமாணம். 'டார்க் நைட்', 'இன்செப்ஷன்', 'ஓப்பன்ஹீமர்' என ஒவ்வொரு படத்திலும் ரசிகர்களைத் திகைக்க வைத்த இந்த ஆஸ்கர் விருது பெற்ற இயக்குநரின் புதிய படம் 'தி ஒடிஸி' (The Odyssey) இப்போது அனைவரின் கவனத்தையும் ஈர்த்துள்ளது.

ஹோமரின் புகழ்பெற்ற கிரேக்க இதிகாசத்தை அடிப்படையாகக் கொண்டு, 250 மில்லியன் டாலர் மாபெரும் பட்ஜெட்டில் உருவாகியுள்ள இந்த பிரம்மாண்டப் படத்தின் லண்டன் பிரீமியர் நிகழ்வு அண்மையில் நிறைவடைந்தது. அந்தக் காட்சியைக் கண்ட சர்வதேச திரைப்பட விமர்சகர்கள் இதை "திரைப்படக் கலையின் உச்சகட்ட விருந்து" என்றும், "குறைபாடற்றதும், மூச்சடைக்கவைப்பதுமான அற்புதம்" என்றும் வகைப்படுத்தி, ஒருமனதாகப் பாராட்டி வருகின்றனர்.

இந்தப் படம் ஹாலிவுட் வரலாற்றில் ஒரு புதிய அத்தியாயத்தை எழுதியுள்ளது. முழுக்க முழுக்க ஐமேக்ஸ் (IMAX) பிலிம் கேமராக்களை மட்டுமே பயன்படுத்தி படமாக்கப்பட்ட முதல் திரைப்படம் என்ற பெருமையை 'தி ஒடிஸி' பெற்றுள்ளது. இந்த சவாலான முயற்சிக்காகவே நோலன் சிறப்பு வகை இலகுரக, இரைச்சலற்ற ஐமேக்ஸ் கேமராக்களைப் பயன்படுத்தியுள்ளார்.

விமர்சகர்களின் கூற்றுப்படி, நோலனின் முந்தைய படைப்புகளை விட இதன் காட்சி அமைப்புகள் மிகவும் பிரமாண்டமானவை. குறிப்பாக, கணினி வரைகலை (CGI) எதுவுமின்றி முற்றிலும் நிஜமான கப்பல்களைக் கொண்டு கடலில் படமாக்கப்பட்ட அதிரடி காட்சிகள், திரையரங்குகளில் ரசிகர்களை வியப்பில் ஆழ்த்தும் வகையில் அமைந்துள்ளதாக தெரிவிக்கின்றனர்.

நடிகர்களின் நடிப்பும் விமர்சகர்களை மிரட்டியுள்ளது. கிரேக்க மன்னன் ஒடிஸியஸாக உயிரூசும் மேட் டாமன் (Matt Damon), இது அவரது திரைப்பயணத்திலேயே மிக உயர்ந்த நடிப்பு என்று பாராட்டப்படுகிறார். அதேசமயம், எதிர்மறைக் கதாபாத்திரமான அன்டினஸாக (Antinous) வரும் ராபர்ட் பாட்டின்சனும் (Robert Pattinson) தனது வசீகரமான நடிப்பால் அனைவரின் கவனத்தையும் கவர்ந்துள்ளார்.

அண்ணா ஹாத்வே, டாம் ஹாலந்து, ஜெண்டாயா, சார்லிஸ் தெரோன் என பல முன்னணி நட்சத்திரங்கள் இந்த காவியத்தில் தங்களின் பங்களிப்பைச் சிறப்பாகச் செய்துள்ளனர்.

நோலன் படங்களின் வழக்கமான பாணியான அறிவியல் புதிர்கள் இந்தப் படத்தில் இல்லை என்றாலும், கிரேக்க புராணங்களின் அமானுஷ்ய, திகில் கூறுகளை மிகவும் நேர்த்தியாக தன் கைவண்ணத்தில் இணைத்துள்ளார் என விமர்சகர் எரிக் டேவிஸ் குறிப்பிட்டுள்ளார். படத்தின் இறுதி 20 நிமிடக் காட்சிகள் பார்வையாளர்களை மெய் மறக்கச் செய்யும் என்றும், கண்களைக் குவிக்க வைக்கும் என்றும் பல முன்னணி இதழ்கள் செய்தி வெளியிட்டுள்ளன.

இந்த பிரமாண்டப் படத்தின் உலகளாவிய சுற்றுப்பயணத்தின் ஒரு பகுதியாக, படக்குழு ஜூலை 11 அன்று மும்பையில் நடைபெறும் இந்திய பிரீமியர் காட்சிக்கு வருகை தரவிருக்கிறது. அதைத் தொடர்ந்து, ஜூலை 17 அன்று இத்திரைப்படம் உலகம் முழுவதும் உள்ள திரையரங்குகளில் வெளியாகவுள்ளது.