கீழே விழுந்த கைப்பை... நிறுத்தப்பட்ட பைக்... காதலனுடன் சேர்ந்து கணவரை கொலை செய்த மனைவி: ஆந்திராவில் அதிர்ச்சி சம்பவம்

ஆந்திர மாநிலத்தில் கணவரை திட்டமிட்டு கொலை செய்ததாக இளம் பெண் ஒருவர் தனது காதலனுடன் கைது செய்யப்பட்ட சம்பவம் பெரும் அதிர்ச்சியை ஏற்படுத்தியுள்ளது. மலைக்கோவிலுக்கு சென்றபோது நடந்த இந்த கொடூர சம்பவத்தின் பின்னணியில் காதல் விவகாரம் இருப்பது போலீஸ் விசாரணையில் தெரியவந்துள்ளது.

தமிழகத்தின் கிருஷ்ணகிரி மாவட்டம் சூளகிரி பகுதியைச் சேர்ந்த ரமேஷ், ஓசூரில் உள்ள தனியார் நிறுவனத்தில் பணியாற்றி வந்தார். இவருக்கு ஹாசினி (19) என்ற மனைவியும், ஒரு மகளும் உள்ளனர்.

சம்பவத்தன்று ரமேஷ் தனது மனைவி ஹாசினி மற்றும் மகளுடன் ஆந்திர மாநிலம் குடுப்பள்ளி மண்டலத்தில் உள்ள மல்லப்பா கொண்டா மலை உச்சியில் அமைந்துள்ள ஸ்ரீ மல்லேஸ்வர சுவாமி கோவிலுக்கு சென்றுள்ளார்.

மலைப்பாதையில் சென்று கொண்டிருந்தபோது, எதிர்பாராத விதமாக ஹாசினியின் கைப்பை கீழே விழுந்துள்ளது. இதனால் ரமேஷ் தனது இருசக்கர வாகனத்தை நிறுத்தியுள்ளார். அந்த நேரத்தில் மறைந்திருந்த சிலர் திடீரென வெளியே வந்து ரமேஷை வனப்பகுதிக்குள் விரட்டிச் சென்று கூர்மையான ஆயுதங்களால் தாக்கி கொலை செய்ததாக போலீசார் தெரிவித்துள்ளனர்.

இந்த சம்பவம் தொடர்பாக வழக்குப் பதிவு செய்த போலீசார், அப்பகுதியில் இருந்த கண்காணிப்பு கேமரா காட்சிகள் மற்றும் மொபைல் போன் தகவல்களை ஆய்வு செய்தனர். அப்போது, கொலை நடந்த பிறகு ஹாசினி இரண்டு பேருடன் அங்கிருந்து பைக்கில் சென்றது தெரியவந்தது.

மேலும், சம்பவம் நடந்த பகுதியில் செயல்பாட்டில் இருந்த மொபைல் போன்களின் விவரங்களை ஆய்வு செய்தபோது, கொலைச் சம்பவத்தில் ஹாசினிக்கு தொடர்பு இருப்பது கண்டுபிடிக்கப்பட்டதாக போலீசார் தெரிவித்தனர்.

காதலனுடன் சேர்ந்து தீட்டிய கொலைத் திட்டம்

போலீஸ் விசாரணையில், ஹாசினி சிறுவயது முதலே யுகந்தர் என்பவரை காதலித்து வந்ததாகவும், திருமணத்திற்குப் பிறகும் அந்த உறவு தொடர்ந்ததாகவும் தெரியவந்துள்ளது.

ரமேஷை கொலை செய்ய இருவரும் திட்டமிட்டதாகவும், அதற்காக மலைக்கோவிலுக்கு செல்ல வேண்டும் என்று ஹாசினி தனது கணவரை சம்மதிக்க வைத்ததாகவும் போலீசார் கூறியுள்ளனர்.

பயணத்தின் போது, ஹாசினி தனது செல்போன் மூலம் ரமேஷின் இருப்பிடத்தை யுகந்தருடன் தொடர்ந்து பகிர்ந்து கொண்டதாகவும், இதன் மூலம் தாக்குதல் நடத்தியவர்கள் அவர்களின் நகர்வுகளை கண்காணித்ததாகவும் போலீசார் தெரிவித்துள்ளனர்.

திட்டமிட்டபடி, மலைப்பாதையில் உள்ள ஒரு வளைவு பகுதியில் ஹாசினி தனது கைப்பையை கீழே போட்டதாகவும், அதை எடுக்க ரமேஷ் பைக்கை நிறுத்தியபோது மறைந்திருந்த யுகந்தரும் அவரது கூட்டாளிகளும் வெளியே வந்து தாக்குதல் நடத்தியதாகவும் விசாரணையில் தெரியவந்துள்ளது.

ரமேஷை சுமார் 100 மீட்டர் தூரம் வனப்பகுதிக்குள் விரட்டிச் சென்று கொலை செய்ததாகவும், இந்த சம்பவம் அவர்களது மகள் அருகில் இருந்தபோதே நடந்ததாகவும் போலீசார் தெரிவித்துள்ளனர்.

ஹாசினியின் தாயார் அளித்த புகாரின் அடிப்படையில் தொடங்கிய விசாரணையில், இந்த கொலைச் சதியின் பின்னணி வெளிச்சத்துக்கு வந்துள்ளது. இந்த வழக்கில் தொடர்புடையவர்களிடம் போலீசார் தொடர்ந்து விசாரணை நடத்தி வருகின்றனர்.