காதலை முறித்த சட்டக்கல்லூரி மாணவி குத்திக்கொலை: காதலனும் சகோதரரும் கைது

பெங்களூருவில் காதல் உறவை முறித்த சட்டக்கல்லூரி மாணவி ஒருவர் கத்தியால் குத்திக் கொலை செய்யப்பட்ட சம்பவம் பெரும் அதிர்ச்சியை ஏற்படுத்தியுள்ளது. இந்த வழக்கில் மாணவியின் முன்னாள் காதலரும், அவரது சகோதரரும் போலீசாரால் கைது செய்யப்பட்டுள்ளனர்.

பெங்களூரைச் சேர்ந்த சட்டக்கல்லூரி மாணவி அமிர்தா, தனுஷ் என்ற இளைஞருடன் காதல் உறவில் இருந்ததாக கூறப்படுகிறது. பின்னர், தனுஷ் ஏற்கனவே திருமணம் செய்து விவாகரத்து பெற்றவர் என்பதையும், அவருக்கு ஒரு குழந்தை இருப்பதையும் அமிர்தா அறிந்ததாக போலீஸ் விசாரணையில் தெரியவந்துள்ளது.

இதையடுத்து அமிர்தா அந்த காதல் உறவை முடிவுக்கு கொண்டுவந்ததாக கூறப்படுகிறது. இந்த நிலையில், சம்பவத்தன்று மாலை கோடஹள்ளி பகுதியில் உள்ள தனது வீட்டின் அருகே அமிர்தா நடந்து சென்றபோது, தனுஷின் சகோதரர் சூர்யா அவரை வழிமறித்துள்ளார்.

அப்போது, தனது சகோதரருடனான காதல் உறவை ஏன் முறித்துக்கொண்டாய் என்று கேட்டு இருவருக்கும் இடையே வாக்குவாதம் ஏற்பட்டதாக கூறப்படுகிறது. வாக்குவாதம் தீவிரமடைந்த நிலையில், சூர்யா கத்தியால் அமிர்தாவை பலமுறை குத்திவிட்டு அங்கிருந்து தப்பிச் செல்ல முயன்றதாக போலீசார் தெரிவித்துள்ளனர்.

சம்பவத்தை பார்த்த பொதுமக்கள் சூர்யாவை மடக்கிப் பிடித்து போலீசாரிடம் ஒப்படைத்தனர். பலத்த காயமடைந்த அமிர்தா உடனடியாக மருத்துவமனையில் அனுமதிக்கப்பட்டு தீவிர சிகிச்சை அளிக்கப்பட்டது. இருப்பினும், 48 மணி நேர சிகிச்சைக்குப் பிறகு அவர் உயிரிழந்தார்.

போலீசார் வழக்குப் பதிவு செய்து விசாரணை மேற்கொண்டதில், காதல் உறவை முறித்தால் கடுமையான விளைவுகளை சந்திக்க நேரிடும் என்று சூர்யா ஏற்கனவே அமிர்தாவை மிரட்டியிருந்ததாக தகவல் வெளியாகியுள்ளது.

மேலும், இந்தக் கொலை சம்பவத்தில் நேரடியாக தாக்குதல் நடத்தியதாகக் கூறப்படும் சூர்யாவுடன், முன்னாள் காதலரான தனுஷும் கைது செய்யப்பட்டுள்ளார். இந்தச் சம்பவம் தொடர்பாக இருவரிடமும் போலீசார் தொடர்ந்து விசாரணை நடத்தி வருகின்றனர்.

போலீஸ் தகவலின்படி, அமிர்தாவும் தனுஷும் ஒரே பகுதியில் வசித்து வந்துள்ளனர். மத நிகழ்ச்சி ஒன்றில் ஏற்பட்ட அறிமுகம் பின்னர் காதலாக மாறியதாகவும், அதன் பின்னரே இந்த துயர சம்பவம் நிகழ்ந்ததாகவும் கூறப்படுகிறது.