இயக்குநர் ஸ்ரீகாந்த் நாகோத்தியை 2-வது திருமணம் செய்துகொண்டார் நடிகை ஸ்வாதி ரெட்டி: இணையத்தில் வைரலாகும் திருமணப் புகைப்படங்கள்!

சசிகுமாரின் 'சுப்ரமணியபுரம்' படத்தின் மூலம் தமிழ் நெஞ்சங்களில் இடம்பிடித்த நடிகை ஸ்வாதி ரெட்டி, தெலுங்கு இயக்குநர் ஸ்ரீகாந்த் நாகோத்தி என்பவரைத் ரகசியமாகத் திருமணம் செய்துகொண்டார். இவர்களது எளிய திருமணப் புகைப்படங்கள் தற்போது சமூக வலைத்தளங்களில் வெளியாகி வைரலாகி வருகின்றன.

தெலுங்குத் திரையுலகில் அறிமுகமாகி, தமிழில் 'சுப்ரமணியபுரம்' படத்தின் பிரம்மாண்ட வெற்றிக்குப் பிறகு கனிமொழி, போராளி, வடகறி, யட்சன் உள்ளிட்ட பல படங்களில் நடித்தவர் ஸ்வாதி. தமிழ், தெலுங்கு, மலையாளம் என மூன்று மொழிகளிலும் பிஸியான நடிகையாக வலம் வந்த இவர், கடந்த 2018-ஆம் ஆண்டு விகாஸ் என்பவரைக் காதலித்துத் திருமணம் செய்துகொண்டார். ஆனால், கருத்து வேறுபாடு காரணமாக இவர்கள் இருவரும் கடந்த 2022-ஆம் ஆண்டு விவாகரத்து பெற்று பிரிந்தனர்.

அதன் பிறகு, கடந்த 2023-ஆம் ஆண்டு ஸ்வாதி நடிப்பில் வெளியான 'மந்த் ஆஃப் மது' (Month of Madhu) என்ற தெலுங்குத் திரைப்படத்திற்குப் பின் அவர் வேறு எந்தப் படங்களிலும் நடிக்காமல் இருந்து வந்தார்.

இந்த நிலையில், கடந்த செவ்வாய்க்கிழமை அன்று 'மந்த் ஆஃப் மது' படத்தின் இயக்குநரான ஸ்ரீகாந்த் நாகோத்தியை அவர் இரண்டாவதாகக் காதலித்துத் திருமணம் செய்துகொண்டார். அந்தப் படத்தின் படப்பிடிப்பின் போதே இருவருக்கும் இடையே காதல் மலர்ந்ததாகக் கூறப்படுகிறது.

நெருங்கிய குடும்பத்தினர் மற்றும் மிக முக்கிய நண்பர்கள் மட்டுமே கலந்துகொண்ட இந்தத் திருமணம் மிக எளிமையான முறையில் நடந்து முடிந்துள்ளது. தற்போது ஸ்வாதி ரெட்டியின் இந்தத் திருமணப் புகைப்படங்களைப் பார்த்து ரசிகர்கள் தங்களது வாழ்த்துக்களைத் தெரிவித்து வருகின்றனர்.