பிசிசிஐக்கு புது தலைவர்? கம்பீருக்கு பிடித்த நபர் தேர்வு செய்யப்பட வாய்ப்பு! யார் இந்த மிதுன் மன்ஹாஸ்?

இந்திய கிரிக்கெட் கட்டுப்பாட்டு வாரியத்தின் (BCCI) தலைவராக இருந்த ரோஜர் பென்னி பதவி விலகியதைத் தொடர்ந்து, புதிய நிர்வாகியைத் தேர்வு செய்யும் பணியில் பிசிசிஐ நிர்வாகிகள் தீவிரமாக ஈடுபட்டு வருகின்றனர். இந்தச் சூழலில், முன்னாள் சென்னை சூப்பர் கிங்ஸ் (CSK) வீரரும், கவுதம் கம்பீருக்கு நெருக்கமானவருமான மிதுன் மன்ஹாஸ் புதிய தலைவராகத் தேர்வு செய்யப்பட வாய்ப்பு இருப்பதாகத் தகவல் வெளியாகியுள்ளது.

பிசிசிஐ தலைவர் பதவிக்கு சௌரப் கங்குலி மற்றும் ஹர்பஜன் சிங் போன்ற பெரிய வீரர்கள் போட்டியிட்டனர். இந்த இருவரில் ஒருவரைத்தான் தேர்வு செய்ய அதிக வாய்ப்பு இருப்பதாக முன்பு கருதப்பட்டது.

எனினும், கடைசி நேரத்தில், ஜம்மு காஷ்மீர் மாநிலத்தைச் சேர்ந்த மிதுன் மன்ஹாஸ் வேட்பு மனு தாக்கல் செய்ததாகவும், இது கௌதம் கம்பீரின் அறிவுறுத்தலின் பேரில் நடந்ததாகவும் கூறப்படுகிறது.

புதிய பிசிசிஐ தலைவரைத் தேர்வு செய்ய செப்டம்பர் 28ஆம் தேதிதான் கடைசி நாள். ஆனால், அதற்குள்ளாகவே, மன்ஹாஸ் தேர்வு செய்யப்பட்டுவிட்டதாகவும், இதற்கான அறிவிப்பு விரைவில் வெளியாகும் என்றும் தகவல் வெளியாகி உள்ளது.

யார் இந்த மிதுன் மன்ஹாஸ்?

45 வயதான மிதுன் மன்ஹாஸ், கிரிக்கெட் வட்டாரத்தில் முன்பு 'அதிர்ஷ்டம் இல்லாத வீரர்' என்று அழைக்கப்பட்டார்.

அவர் 1997-98ஆம் ஆண்டில் டெல்லி அணிக்காக உள்ளூர் பார்மெட்டில் அறிமுகமானார். அந்த சமயத்தில், சச்சின் டெண்டுல்கர், விவிஎஸ் லக்‌ஷ்மன், ராகுல் டிராவிட் போன்ற வீரர்களின் ஆதிக்கம் காரணமாக, உள்ளூர் தொடர்களில் தொடர்ச்சியாக ரன்களைக் குவித்தபோதிலும், மன்ஹாஸால் இந்திய அணிக்கு விளையாட முடியவில்லை. இவர் டெல்லி அணிக்கு கேப்டனாக இருந்தபோதுதான், விராட் கோலி டெல்லி உள்ளூர் கிரிக்கெட்டில் அறிமுகமானார் என்பது குறிப்பிடத்தக்கது.

2007ஆம் ஆண்டில், கவுதம் கம்பீர் தலைமையிலான டெல்லி அணியில் விளையாடிய மன்ஹாஸ், தொடர்ச்சியாக சிறப்பாகச் செயல்பட்டார். அவர் அப்போது 57.56 சராசரியில் 921 ரன்களை எடுத்தார். இவரது அபாரமான பேட்டிங் காரணமாகத்தான் டெல்லி அணி கோப்பையை வென்றது. அப்போது இருந்தே மன்ஹாஸுடன் கம்பீர் நெருக்கம் காட்டினார்.

கம்பீர் சென்ற பிறகு, ஒரு காலகட்டத்தில் டெல்லி அணியில் மன்ஹாஸுக்கு முக்கியத்துவம் குறைய ஆரம்பித்தது. இதனால், 2015ஆம் ஆண்டில் அவர் தனது சொந்த மாநிலமான ஜம்மு காஷ்மீர் அணிக்குச் சென்றார்.

அவர் மொத்தம் 157 முதல்தரப் போட்டிகளில் விளையாடி, 27 சதம் உட்பட 9714 ரன்களை எடுத்துள்ளார். மேலும், 130 லிஸ்ட் ஏ போட்டிகளில் 4126 ரன்களையும், 91 டி20 போட்டிகளில் 1170 ரன்களையும் எடுத்துள்ளார்.

2008ஆம் ஆண்டில், கவுதம் கம்பீரின் பரிந்துரை காரணமாக, டெல்லி டேர்டெவில்ஸ் அணி மன்ஹாஸை வாங்கியது. அவர் 2010ஆம் ஆண்டு வரை டெல்லி அணியில் இடம்பெற்றிருந்தார். பிறகு, புனே வாரியர்ஸ் இந்தியா அணிக்குச் சென்றார். அதைத் தொடர்ந்து, 2014ஆம் ஆண்டில், மகேந்திரசிங் தோனி தலைமையிலான சென்னை சூப்பர் கிங்ஸ் அணிக்காக விளையாடினார்.

மொத்தம் 55 ஐபிஎல் போட்டிகளில் விளையாடி, 22.34 சராசரியில் 514 ரன்களை அவர் எடுத்தார். 2017ஆம் ஆண்டில், பஞ்சாப் கிங்ஸ் அணிக்குத் துணைப் பயிற்சியாளராக இருந்தார். அதன்பிறகு, வங்கதேச யு19 அணிக்காகப் பேட்டிங் ஆலோசகராகவும், பின்னர், ராயல் சேலஞ்சர்ஸ் பெங்களூர் அணிக்குத் துணைப் பயிற்சியாளராகவும் (இரண்டு வருடங்களுக்குப் பிறகு) பணியாற்றினார். கடைசியாக, 2022ஆம் ஆண்டில் குஜராத் டைடன்ஸ் அணிக்குத் துணைப் பயிற்சியாளராக இருந்தார், மேலும் கடந்த சீசன் வரை அப்பதவியில் நீடித்தார்.

நாட்டு நடப்புகளை உங்கள் அலைபேசியில் பெற்றுக்கொள்ள Colomboதமிழ் WHATSAPP மற்றும் GOOGLE NEWS பக்கத்தில் இணையுங்கள்.

WHATSAPP CHANNEL GOOGLE NEWS