இந்தியா vs பாகிஸ்தான்: டாஸ் போடும்போது சூர்யகுமார் யாதவும் சல்மான் ஆகாவும் கைகுலுக்கினார்களா?

2026 டி20 உலகக்கோப்பையில் இந்தியா–பாகிஸ்தான் மோதல் தொடங்கியுள்ள நிலையில், டாஸ் வென்ற பாகிஸ்தான் கேப்டன் சல்மான் ஆகா முதலில் பந்துவீச்சைத் தேர்வு செய்தார். இந்திய பேட்ஸ்மேன்கள் முதலில் ரன்கள் குவிக்க வேண்டிய சூழல் உருவாகியுள்ளது.

டாஸ் நிகழ்வில் கவனம் ஈர்த்த முக்கிய அம்சம், இரு கேப்டன்களும் வழக்கமான கைகுலுக்கலை தவிர்த்ததே. நாணயம் வீசப்பட்டபின் “ஹெட்ஸ்” என்று அழைத்த ஆகா டாஸ் வென்றார். ஆனால் அதன் பின்னர் இந்திய கேப்டன் சூர்யகுமார் யாதவ் மற்றும் ஆகா இடையே வழக்கமான நட்பு கைகுலுக்கல் இடம்பெறவில்லை.

ஆசியக் கோப்பை காலத்திலிருந்து இந்தியா–பாகிஸ்தான் கேப்டன்கள் இடையிலான இந்த “நோ ஹேண்ட்ஷேக்” நிலை தொடர்கிறது எனக் கூறப்படுகிறது. இந்த முறை இருவரும் ஒருவரை ஒருவர் நேராக பார்க்காமலேயே, தீவிர முகபாவனையுடன் எதிர் திசைகளில் கவனம் செலுத்தியதாகக் கவனிக்கப்பட்டது. டாஸ் முடிந்தபின் அருகருகே கடந்தும் கைகுலுக்காமல் சென்றனர்.

போட்டிக்கான இந்திய அணியில் இரண்டு மாற்றங்களை சூர்யகுமார் யாதவ் உறுதிப்படுத்தினார். வயிற்றுப் பிரச்சினையால் நமீபியா எதிரான கடந்த போட்டியை தவறவிட்ட அபிஷேக் சர்மா மீண்டும் அணியில் இணைந்துள்ளார். மேலும் அர்ஷ்தீப் சிங்கிற்குப் பதிலாக சுழற்பந்து வீச்சாளர் குல்தீப் யாதவ் அணியில் சேர்க்கப்பட்டுள்ளார்.

டாஸ் பிறகு பேசிய சூர்யகுமார், “நாங்கள் முதலில் பேட்டிங் செய்ய விரும்பினோம். கடந்த இரண்டு போட்டிகளில் இலக்கை பாதுகாத்து வென்றோம், அதையே தொடர விரும்பினோம். இது மிகுந்த அழுத்தம் கொண்ட போட்டி. எந்த அணியும் எந்த நாளிலும் வெல்ல முடியும்,” என்று தெரிவித்தார்.

இந்தியா (XI):

அபிஷேக் சர்மா, இஷான் கிஷன் (விக்கெட் கீப்பர்), திலக் வர்மா, சூர்யகுமார் யாதவ் (கேப்டன்), ஹர்திக் பாண்டியா, சிவம் துபே, ரிங்கு சிங், அக்சர் படேல், குல்தீப் யாதவ், வருண் சக்கரவர்த்தி, ஜஸ்பிரித் பும்ரா

பாகிஸ்தான் (XI):

சயிம் அயூப், சாஹிப்சதா ஃபர்ஹான், சல்மான் ஆகா (கேப்டன்), பாபர் அசாம், முகமது நவாஸ், ஷதாப் கான், பஹீம் அஷ்ரப், உஸ்மான் கான் (விக்கெட் கீப்பர்), ஷாகின் அப்ரிடி, அப்ரார் அகமது, உஸ்மான் தாரிக்