ஹோர்முஸ் நீரிணையில் சரக்குக் கப்பல் விபத்து: கடலில் மிதந்த ஐபோன்கள் மற்றும் வாசனைத் திரவியங்களை அள்ளிய மீனவர்கள்
ஈரானின் வளைகுடா கடற்கரைப் பகுதியான ஹோர்முஸ் நீரிணைக்கு அருகில் சரக்குக் கப்பலொன்று விபத்துக்குள்ளாகி மூழ்கியதைத் தொடர்ந்து, கடலில் மிதந்த பெறுமதிமிக்க பொருட்களை அப்பகுதி மீனவர்கள் போட்டிபோட்டு அள்ளிச் சென்றுள்ளமை சர்வதேச ரீதியில் பெரும் கவனத்தை ஈர்த்துள்ளது.
சிங்கப்பூர் கொடியுடன் பயணித்த 'ஜிஎஃப்எஸ் ப்ரைட்' (GFS Pride) எனும் குறித்த சரக்குக் கப்பல் கடந்த 14 ஆம் திகதி விபத்துக்குள்ளாகி கடலில் மூழ்கியதில், அதிலிருந்த ஆயிரக்கணக்கான கொள்கலன்கள் மற்றும் பொருட்கள் கடலில் மிதக்கத் தொடங்கின.
இதனையறிந்த அப்பகுதி மீனவர்கள் தமது சிறிய மீன்பிடிப் படகுகளில் விரைந்து சென்று, கடலில் மிதந்த ஐபோன்கள், பெறுமதிமிக்க வாசனைத் திரவியங்கள் உள்ளிட்ட பல்வேறு பொருட்களை எடுத்துச் சென்ற காணொளிகள் சமூக வலைத்தளங்களில் பரவலாகப் பகிரப்பட்டு வருகின்றன.
சுமார் 2,500 இற்கும் அதிகமான கொள்கலன்களுடன் பயணித்த இந்தக் கப்பலில் திடீரென தீ விபத்து ஏற்பட்டதாகவும், அடையாளம் தெரியாத ஏவுகணை அல்லது மர்மப் பொருள் தாக்கியமையே விபத்துக்குக் காரணம் என்றும் சிங்கப்பூர் கடல்சார் மற்றும் துறைமுக அதிகார சபை தெரிவித்துள்ளது. எனினும், கப்பலில் பணியாற்றிய 21 மாலுமிகளும் எவ்வித காயங்களுமின்றி பாதுகாப்பாக மீட்கப்பட்டுள்ளதாக உறுதிப்படுத்தப்பட்டுள்ளது.
இதேவேளை, குறித்த கப்பலானது தடைசெய்யப்பட்ட மற்றும் பாதுகாப்பற்ற கடல் எல்லைக்குள் நுழைந்தமையால், கடலில் புதைக்கப்பட்டிருந்த மிதிவெடியில் மோதியே விபத்துக்குள்ளானதாக ஈரானிய புரட்சிகர காவல்படையின் கடற்படைப் பிரிவு தெரிவித்துள்ளது.
