கான்லியின் போராட்டம் வீண்.. 33 ரன்கள் வித்தியாசத்தில் பஞ்சாப்பை வீழ்த்திய ஹைதராபாத்

ஐபிஎல் 2026 தொடரில் நடைபெற்ற முக்கிய லீக் போட்டியில் சன்ரைசர்ஸ் ஹைதராபாத் அணி, பஞ்சாப் கிங்ஸ் அணியை 33 ரன்கள் வித்தியாசத்தில் வீழ்த்தியது. ஹைதராபாத்திலுள்ள ராஜீவ் காந்தி சர்வதேச மைதானத்தில் நடைபெற்ற இந்த போட்டியில் டாஸ் வென்ற பஞ்சாப் அணி முதலில் பந்துவீச்சை தேர்வு செய்தது.

முதலில் பேட்டிங் செய்த சன்ரைசர்ஸ் ஹைதராபாத் அணி தொடக்கம் முதலே அதிரடியாக விளையாடியது. தொடக்க வீரர்களான அபிஷேக் சர்மா மற்றும் டிராவிஸ் ஹெட் இணைந்து வேகமான ரன் குவிப்பில் ஈடுபட்டனர். அபிஷேக் சர்மா 35 ரன்களிலும், டிராவிஸ் ஹெட் 38 ரன்களிலும் வெளியேறினர்.

அதன்பிறகு களமிறங்கிய இஷான் கிஷான் அதிரடியாக விளையாடி ரன் வேகத்தை உயர்த்தினார். அவருடன் ஹெய்ன்ரிச் கிளாசனும் தாக்குதலான ஆட்டத்தை வெளிப்படுத்தினார். இறுதிக்கட்டத்தில் நிதிஷ் குமார் ரெட்டி அதிரடியாக விளையாடியதால், ஹைதராபாத் அணி 20 ஓவர்கள் முடிவில் 4 விக்கெட் இழப்பிற்கு 235 ரன்கள் குவித்தது.

இந்த போட்டியில் பஞ்சாப் அணியின் ஃபீல்டிங் கடுமையாக விமர்சிக்கப்பட்டது. குறிப்பாக, ஹெய்ன்ரிச் கிளாசன் கொடுத்த எளிய கேட்சை ஷஷாங்க் சிங் தவறவிட்ட சம்பவம் ரசிகர்களிடையே பேசுபொருளானது. இதையடுத்து பஞ்சாப் அணியின் தலைமை பயிற்சியாளர் ரிக்கி பாண்டிங் தனது அதிருப்தியை வெளிப்படுத்தினார்.

கமெண்ட்ரியில் பேசிய ரிக்கி பாண்டிங், “பந்து எங்கு சென்றாலும் ஷஷாங்க் பக்கம் தான் செல்கிறது. அவருக்கு ஏதோ வைரஸ் பிடித்தது போல தெரிகிறது” என நகைச்சுவையாக கூறினார். ஆனால் அவரது கருத்தில் ஏமாற்றமும் வெளிப்பட்டதாக ரசிகர்கள் சமூக வலைதளங்களில் பதிவிட்டு வருகின்றனர்.

236 ரன்கள் என்ற கடின இலக்குடன் களமிறங்கிய பஞ்சாப் அணி, ஹைதராபாத் பந்துவீச்சை சமாளிக்க முடியாமல் தொடர்ந்து விக்கெட்டுகளை இழந்தது. இருப்பினும், மறுபுறம் கூப்பர் கான்லி தனியாக போராடினார். அதிரடியான ஆட்டத்தை வெளிப்படுத்திய அவர் கடைசி வரை ஆட்டமிழக்காமல் 107 ரன்கள் குவித்தார்.

ஆனால் அவருக்கு மற்ற வீரர்களிடமிருந்து போதிய ஒத்துழைப்பு கிடைக்காததால், பஞ்சாப் அணி 20 ஓவர்கள் முடிவில் 202 ரன்கள் மட்டுமே எடுத்தது. இதன் மூலம் சன்ரைசர்ஸ் ஹைதராபாத் அணி 33 ரன்கள் வித்தியாசத்தில் வெற்றி பெற்றது.