இந்தியக் கல்வி முறை லட்சக்கணக்கான மாணவர்களைப் புறக்கணிக்கிறது: ராகுல் காந்தி குற்றச்சாட்டு
இந்தியாவின் தற்போதைய கல்வி முறை அனைவரையும் உள்ளடக்கியதாக இல்லை என்றும், லட்சக்கணக்கான மாணவர்களை வெளியேற்றும் நோக்கில் அது வடிவமைக்கப்பட்டுள்ளதாகவும் மக்களவை எதிர்க்கட்சித் தலைவர் ராகுல் காந்தி விமர்சித்துள்ளார். மாணவர்கள் சிலருடன் தாம் கலந்துரையாடிய காணொலியை அவர் தனது இன்ஸ்டாகிராம் பக்கத்தில் பகிர்ந்துள்ளார்.
அந்தக் காணொலியில் பேசிய ராகுல் காந்தி, நாட்டின் கல்வி முறை நம்பிக்கை தரக்கூடிய வகையில் இல்லை எனக் குறிப்பிட்டார். பணம், அதிகாரம் இல்லாத அல்லது ஆங்கிலம் பேசத் தெரியாத நபர்களை இந்த அமைப்பு தயக்கமின்றி வெளியே தள்ளிவிடுவதாகவும், எனவே இதை ஒரு கல்விமுறை என்று கூறுவதைவிட விலக்கு முறை என்றுதான் அழைக்க வேண்டும் என்றும் அவர் தெரிவித்தார்.
லட்சக்கணக்கான இளைஞர்களைக் கல்வி வளையத்திலிருந்து வெளியே வைத்திருக்கவே இந்த கட்டமைப்பு வழிவகுக்கிறது என்றும் அவர் சுட்டிக்காட்டினார்.
மாணவர்களின் குரல் என்ற முன்னெடுப்பின் கீழ் பல்வேறு நகரங்களில் மாணவர்களை ராகுல் காந்தி நேரில் சந்தித்துப் பேசி வருகிறார். முன்னதாக கோட்டா, டேராடூன், பிரயாக்ராஜ், புனே மற்றும் இந்தூர் ஆகிய நகரங்களைத் தொடர்ந்து, சமீபத்தில் சென்னையிலும் இந்நிகழ்ச்சி நடத்தப்பட்டது.
மாணவர்கள் சந்திக்கும் சவால்கள், அவர்களின் தேவைகள் மற்றும் அவர்கள் எதிர்பார்க்கும் தீர்வுகள் குறித்து கலந்துரையாடி, மாணவச் சமுதாயத்தின் குரலை தேசிய அளவில் கொண்டு செல்லும் நோக்கில் இந்நிகழ்ச்சிகள் நடத்தப்பட்டு வருகின்றன.
