விராட் பாயை சீக்கிரம் அவுட் செய்யணும்! – தோல்விக்குப் பிறகு இஷான் கிஷன் அதிரடி பேச்சு

பெங்களூருவில் நடைபெற்ற IPL 2026 தொடக்கப் போட்டியில் சன்ரைசர்ஸ் ஐதராபாத் அணிக்கு எதிராக ராயல் சேலஞ்சர்ஸ் பெங்களூரு பெற்ற வெற்றி ரசிகர்களை உற்சாகப்படுத்திய நிலையில், தோல்வியடைந்த அணியின் இடைக்கால கேப்டன் இஷான் கிஷன் தனது அணியின் செயல்பாடுகள் குறித்து வெளிப்படையாகப் பேசியுள்ளார்.

முதல் போட்டியிலேயே 6 விக்கெட் வித்தியாசத்தில் தோல்வியை சந்தித்தாலும், அது அணிக்கு ஒரு பாடமாக இருக்கும் என்ற நம்பிக்கையை அவர் வெளிப்படுத்தினார்.

முதலில் பேட்டிங் செய்த ஐதராபாத் அணி 201 ரன்கள் என்ற சவாலான இலக்கை நிர்ணயித்தது. ஆரம்பத்தில் விரைவாக விக்கெட்டுகளை இழந்தது அணிக்கு பின்னடைவை ஏற்படுத்தியதாக கிஷன் கூறினார். “ஷாட் தேர்வுகளில் இன்னும் புத்திசாலித்தனம் காட்டியிருக்க வேண்டும்” என அவர் ஒப்புக்கொண்டார். 

அதே நேரத்தில், 29 ரன்களுக்கு 3 விக்கெட்டுகளை இழந்த நிலையில் இருந்து மீண்டு 200 ரன்களை கடந்தது அணிக்கு தன்னம்பிக்கையை அளிப்பதாகவும் அவர் குறிப்பிட்டார்.

போட்டியின் திருப்புமுனையாக இருந்தது விராட் கோலி ஆட்டம் என கிஷன் திறந்த மனதுடன் பாராட்டினார். “விராட் பாயை எவ்வளவு சீக்கிரம் முடியும் அவ்வளவு சீக்கிரம் அவுட் செய்ய வேண்டும்; இல்லையெனில் அவர் நிலைநிறுத்திக் கொண்டால் கட்டுப்படுத்துவது கடினம்” என்ற அவரது கருத்து, கோலியின் தாக்கத்தை வெளிப்படுத்துகிறது. 69 ரன்களுடன் ஆட்டமிழக்காமல் இருந்த கோலி, போட்டியின் முடிவை தீர்மானித்த முக்கிய வீரராக திகழ்ந்தார்.

பந்துவீச்சு குறித்தும் கிஷன் கவலை வெளியிட்டார். திட்டங்களை சரியாக செயல்படுத்தாததே முக்கிய குறையாக இருந்ததாகவும், 15.4 ஓவர்களிலேயே இலக்கை விட்டுக்கொடுத்தது ஏமாற்றமளிப்பதாகவும் அவர் கூறினார்.

இருப்பினும், இது தொடரின் தொடக்கம் மட்டுமே என்பதால் அடுத்த போட்டிகளில் திருத்தங்களுடன் வலுவாக திரும்புவோம் என்ற நம்பிக்கையையும் வெளிப்படுத்தினார். கேப்டனாக முதல் போட்டியை அனுபவித்ததையும், அணியாக முன்னேறும் உறுதியையும் அவர் வலியுறுத்தியுள்ளார்.