கனடாவில் இலகுவாக குடியுரிமை - வெளியான அறிவிப்பு! எப்போது அமுலுக்கு வரும்?

ஆயிரக்கணக்கான புலம்பெயர்ந்தோருக்கு கனேடிய குடியுரிமை வழங்குவதற்கான புதிய சட்ட முன்மொழிவை கனடா அரசு தயாரித்து வருவதாக தகவல்கள் தெரிவிக்கின்றன. இந்த சட்டம் தொடர்பான மசோதா இம்மாதம் பொதுமன்றத்தில் நிறைவேறி, தற்போது செனட்டின் பரிசீலனையில் உள்ளது.

சட்டம் அங்கீகரிக்கப்பட்டவுடன், கனேடிய பெற்றோரின் வெளிநாட்டில் பிறந்த குழந்தைகள் மற்றும் தத்தெடுத்த குழந்தைகள் தானாகவே குடியுரிமைக்கு தகுதியானவர்களாக மாறுவார்கள்.

குறிப்பாக, ஒரு கனேடிய பெற்றோர் ஒரு குழந்தையைத் தத்தெடுப்பதற்கு முன் அல்லது பிறகு, குறைந்தது மூன்று ஆண்டு காலம் கனடாவில் வசித்திருந்தால், அந்தக் குழந்தை குடியுரிமை பெறும் உரிமை பெறும்.

இந்நியமம் மூலம், பழைய விதிகளின் கீழ் குடியுரிமையை இழந்தவர்களுக்கும் மீண்டும் குடியுரிமை பெற வாய்ப்பு கிடைக்கும். புதிய விதிகள், கனடாவில் அல்லது வெளிநாட்டில் வசிக்கும் கனேடியர்களுக்கு சம உரிமைகள் கிடைப்பதையும், குடும்பங்கள் மீண்டும் இணைவதையும் உறுதி செய்யும் நோக்கத்தைக் கொண்டுள்ளது.

குடியுரிமைக்கான விண்ணப்பத்தில் பெற்றோரின் கனேடிய குடியுரிமை ஆதாரம், கனடாவில் வாழ்ந்த காலத்தை நிரூபிக்கும் ஆவணங்கள், பிறப்பு அல்லது தத்தெடுப்பு பதிவுகள் உள்ளிட்ட முக்கிய ஆவணங்கள் தேவைப்படும்.

செனட் மற்றும் அரசின் இறுதி ஒப்புதலுக்குப் பின், இந்த சட்டம் 2026 ஆம் ஆண்டின் ஆரம்பத்தில் அமுலுக்கு வரும் என எதிர்பார்க்கப்படுகிறது.