ஐரோப்பாவில் எரிமலை சீற்றம்: விமான நிலையம் மூடல் – 400க்கும் மேற்பட்ட விமானங்கள் ரத்து; இந்திய குடும்பங்கள் சிக்கல்!

ஐரோப்பாவில் எரிமலை சீற்றம் காரணமாக நூற்றுக்கணக்கான விமானங்கள் ரத்து செய்யப்பட்டதால், பல குடும்பங்கள் வெளிநாடுகளில் சிக்கிக் கொள்ளும் நிலை ஏற்பட்டுள்ளது. இத்தாலியின் சிசிலி தீவில் அமைந்துள்ள உலகின் மிகச் சுறுசுறுப்பான எரிமலைகளில் ஒன்றான எட்னா, திடீரென கடுமையான சீற்றத்தை வெளிப்படுத்தத் தொடங்கியது. இந்த எரிமலை வெடிப்பின் தாக்கம் முக்கியமாக சிசிலியின் கிழக்கு கடற்கரையில் உள்ள கட்டானியா நகரைச் சென்றடைந்துள்ளது.

வார இறுதியில் இருந்து கட்டானியா விமான நிலையம் (Catania Airport) தனது அனைத்து விமானப் பறப்பு மற்றும் வருகைச் செயல்பாடுகளையும் முழுமையாக நிறுத்தி வைத்துள்ளது. எரிமலையிலிருந்து வெளியேறும் நெருப்புக் கற்கள் மற்றும் அடர் சாம்பல் புகையே இந்த முடிவுக்கு முக்கியக் காரணமாகும். விமான நிலையம் மூடப்பட்டதை அடுத்து, உள்ளூர் நேரப்படி நாளை (ஆகஸ்ட் 14) மாலை 4 மணி வரை அங்கிருந்து புறப்படும் அல்லது அங்கு வந்திறங்கும் எந்தவொரு விமானமும் இயக்கப்படாது என்று அதிகாரிகள் அறிவித்துள்ளனர்.

நிலைமை மேலும் மோசமடைந்துள்ளதால், ஆகஸ்ட் 8 முதல் 11-ஆம் திகதி வரை மட்டும் சுமார் 400 புறப்படும் விமானங்கள் முற்றிலுமாக ரத்து செய்யப்பட்டுள்ளன. இன்று (ஆகஸ்ட் 13) கூடுதலாக 52 விமானங்கள் ரத்து செய்யப்பட்ட நிலையில், 250-க்கும் மேற்பட்ட விமானங்கள் வேறு விமான நிலையங்களுக்கு திருப்பி விடப்பட்டுள்ளன. இந்த விமான ரத்துகள் காரணமாக, பல ஐரோப்பிய நாடுகளில் விடுமுறையை மேற்கொண்டு திரும்பும் இந்தியர்கள் உட்பட நூற்றுக்கணக்கான சுற்றுலாப் பயணிகள் கட்டானியாவிலும், அதன் சுற்றுவட்டார பகுதிகளிலும் தவிப்புடன் தங்கியுள்ளனர்.

விமானப் பயணம் மட்டுமல்லாது, மாற்று போக்குவரத்து வழிகளான பேருந்துகள் மற்றும் ரயில்களில் இருக்கைகள் முழுமையாக முன்பதிவு செய்யப்பட்டுவிட்டதாகவும், மிகவும் அருகில் உள்ள வாடகை வாகனங்களின் கட்டணம் வானளாவ உயர்ந்துள்ளதாகவும் பயணிகள் தெரிவிக்கின்றனர். மேலும், அப்பகுதியில் உள்ள தங்கும் விடுதிகளும் வேகமாக நிரம்பி வருவதால், பயணிகள் பெரும் மன உளைச்சலுக்கு ஆளாகியுள்ளனர்.

தீவின் வடக்குப் பகுதியில் உள்ள பலெர்மோ (Palermo) விமான நிலையம் மட்டும் தற்போது செயல்பட்டு வந்தாலும், அங்கிருந்து செல்லும் விமானங்களில் அனைத்து இருக்கைகளும் முன்பதிவு செய்யப்பட்டுவிட்டதாகவே தகவல்கள் வெளியாகின்றன. இதனால், சிக்கிய பயணிகள் அங்கிருந்து கூட உடனடியாக வெளியேறும் வழி இல்லாமல் தவிக்கின்றனர்.

இந்த எரிமலைச் சீற்றம் சிசிலியை மட்டுமல்லாது அண்டை நாடான மால்டாவையும் பாதித்துள்ளது. எரிமலை சாம்பல் பரவல் காரணமாக மால்டாவிற்கான விமானங்களும் ரத்து செய்யப்பட்டு, பல விமானங்கள் தாமதமாக இயக்கப்படுவதாக விமான நிறுவனங்கள் அறிவித்துள்ளன. பயணிகள் மற்றும் விமான நிறுவனங்கள் மாற்று வழிகளை ஆராய்ந்து வரும் நிலையில், எரிமலை வெடிப்பின் போக்கு அடுத்த சில நாட்களுக்கு விமான சேவைகளை மேலும் பாதிக்கும் என்றே அதிகாரிகள் எச்சரித்துள்ளனர்.