12 பந்தில் 50, 16 சிக்ஸர்களுடன் 148 ரன்கள்! யுவராஜ் சாதனையை சமன் செய்து புதிய சாதனை படைத்த அபிஷேக் சர்மா

சயீத் முஸ்தாக் அலி கோப்பை 2025 டி20 கிரிக்கெட் தொடரின் எலைட் குரூப் சி பிரிவில், நவம்பர் 30, 2025 அன்று ஹைதராபாத்தில் பெங்கால் மற்றும் பஞ்சாப் அணிகள் மோதின. டாஸ் வென்ற பஞ்சாப் அணி, முதலில் பேட்டிங் செய்ய முடிவு செய்தது.

அப்போது களமிறங்கிய அபிஷேக் சர்மா தனது குருவான யுவராஜ் சிங்கின் வரலாற்று சாதனையை நினைவுகூரும் வகையில், வெறும் 12 பந்தில் 50 ரன்கள் அடித்து, இந்தியாவில் டி20 வடிவத்தில் இரண்டாவது வேகமான அரைசதம் அடித்த வீரர் என்ற பெயரைப் பெற்றார். 2007 டி20 உலகக் கோப்பையில் இங்கிலாந்துக்கு எதிராக யுவராஜ் சிங் அதே 12 பந்தில் அரைசதம் அடித்த சாதனையை அபிஷேக் சமன் செய்தார்.

அபிஷேக்கு ஆதரவாக பிரப்சிம்ரன் சிங் அதிரடியாக விளையாடி, 70 ரன்கள் (35 பந்துகள்) அடித்தார். இவர்கள் இருவரும் சேர்ந்து 205 ரன்கள் பார்ட்னர்ஷிப் அமைத்தனர். அபிஷேக் தொடர்ந்து தனது அதிரடி ஆட்டத்தை வைத்து, 32 பந்தில் சதம் அடித்தார்.

பின்னர் அன்மோல்ப்ரீத் சிங் (11), ரமந்திப் சிங் (39), சன்விர் சிங் (22) ஆகியோரும் குறுகிய காலத்தில் ரன்களைக் குவித்தனர். இந்த ஆட்டத்தில் அபிஷேக் சர்மா, 52 பந்துகளில் 148 ரன்கள் (8 பவுண்டரிகள், 16 சிக்ஸர்கள்) அடித்து, 284.62 ஸ்ட்ரைக் ரேட்டுடன் ஆட்டமிழந்தார்.

இதன்மூலம், திலக் வர்மாவின் 151 ரன்களுக்குப் பின், சயீத் முஸ்தாக் அலி கோப்பையில் இந்திய வீரர்களில் இரண்டாவது அதிக தனிப்பட்ட மொத்த ரன்கள் (ஸ்ரேயஸ் ஐயரின் 147 ரன்களை முறியடித்து) எடுத்த பெருமையை அபிஷேக் சர்மா பெற்றார்.

20 ஓவர் முடிவில், பஞ்சாப் அணி 310/5 ரன்கள் குவித்தது. இது, இந்தத் தொடரில் பரோடா அணியின் 349/5 ரன்களுக்குப் பின் இரண்டாவது அதிக மொத்த ரன்கள் குவித்த அணியாக பஞ்சாப் சாதனை படைத்துள்ளது. பெங்கால் அணிக்காக ஆகாஷ் தீப் மட்டும் 2 விக்கெட்டுகளை எடுத்தார்.

அபிஷேக் சர்மாவின் இந்த ஆட்டம், இந்திய டி20 கிரிக்கெட் வரலாற்றில் மறக்க முடியாத ஒரு அதிரடி நிகழ்வாக பதிவாகியுள்ளது.