'அந்த 2 பந்துதான் முக்கியம்'... அட்வைஸ் கொடுத்த தோனி: ஜடேஜா குறித்து பேட்டி!

வெற்றிபெற இது போதுமான இலக்குதான். நாங்கள் சிறப்பாக துவங்கினோம். எங்களுக்கு ஏற்றாற்போல் பந்துவீச வைத்தோம். 

'அந்த 2 பந்துதான் முக்கியம்'... அட்வைஸ் கொடுத்த தோனி: ஜடேஜா குறித்து பேட்டி!

ஐபிஎல் 15ஆவது சீசனின் 46ஆவது லீக் போட்டியில் சென்னை சூப்பர் கிங்ஸ், சன் ரைசர்ஸ் ஹைதராபாத் அணிகள் மோதின.

இதில் முதலில் களமிறங்கிய சிஎஸ்கேவில் ருதுராஜ் கெய்க்வாட் 99 (57), டிவோன் கான்வே 85 (55) ஆகியோர் சிறப்பாக விளையாடி ரன்களை குவித்தனர். இறுதியில் சிஎஸ்கே 20 ஓவர்களில் 202/2 ரன்களை குவித்து அசத்தியது.

இலக்கை துரத்திக் களமிறங்கிய சன் ரைசர்ஸ் ஹைதராபாத் அணியில் அபிஷேக் ஷர்மா 39 (24), கேன் வில்லியம்சன் 47 (37), நிகோலஸ் பூரன் 64 (33) போன்றவர்கள் சிறப்பாக விளையாடினார்கள். 

மார்க்கரம் 17 (10), திரிபாதி 0 (1) பெரிய ஸ்கோர் அடிக்கவில்லை. இறுதியில் சன் ரைசர்ஸ் அணி 20 ஓவர்களில் 189/6 ரன்களை மட்டும் சேர்த்து, 13 ரன்கள் வித்தியாசத்தில் தோற்றது.

தோனி பேட்டி:

இப்போட்டி முடிந்தப் பிறகு பேசிய சிஎஸ்கே கேப்டன் தோனி, ‘‘வெற்றிபெற இது போதுமான இலக்குதான். நாங்கள் சிறப்பாக துவங்கினோம். எங்களுக்கு ஏற்றாற்போல் பந்துவீச வைத்தோம். 

வேகம் குறைந்த பந்துகள்தான் ஒத்துழைப்பு கொடுத்தது. ஸ்பின்னிற்கும் ஒத்துழைப்பு இருந்ததால், பவர் பிளேவுக்கு பிறகு அதிக ஓவர்களை ஸ்பின்னர்கள் வீசினார்கள்’’ எனக் கூறினார்.

மேலும் பேசிய தோனி, ‘‘ஒரு ஓவரில் 4 சிக்ஸர்கள் பறந்தாலும் பிரச்சினை இல்லை. மற்ற இரண்டு பந்துகளை சிறப்பாக வீசி ரன்களை கசியவிடக் கூடாது என பௌலர்களிடம் கூறியிருந்தேன். 

அந்த 2 பந்துகள்தான் திருப்புமுனையாக இருக்கும். இந்த விஷயம் பலமுறை ஒர்க் ஆகியிருக்கிறது. 15ஆவது சீசனில் கேப்டனாக நியமிப்பார்கள் என்பது கடந்த சீசனிலேயே ஜடேஜாவுக்கு தெரியும். கேப்டன்ஸி செய்ய தயாராவதற்கு போதுமான காலம் இருந்தது. அணியை வழிநடத்த தயாரிப்பு மிகவும் முக்கியம்''

''முதல் இரண்டு போட்டிகளில் மட்டுமே ஜடேஜாவுக்கு ஆலோசனை வழங்கினேன். அடுத்தடுத்த போட்டிகளில் அவரே முடிவெடுக்க சுதந்திரம் கொடுக்கப்பட்டது. 17-18 கேட்ச்களை விடுவது ஏற்றுக்கொள்ள முடியாதது. ஜடேஜாவை ஒரு பௌலராக, பேட்டராக, பீல்டராக எனக்கு பிடிக்கும்’’ எனத் தெரிவித்தார்.