Thu, Oct21, 2021
Homeவிளையாட்டுஇது உனக்கு பிறந்த நாள் பரிசு…ரெய்னா ரசிகர்களுக்கு அதிர்ச்சி செய்தி சொன்ன உத்தப்பா!

இது உனக்கு பிறந்த நாள் பரிசு…ரெய்னா ரசிகர்களுக்கு அதிர்ச்சி செய்தி சொன்ன உத்தப்பா!

ஐபிஎல் 14ஆவது சீசன் முதலாவது குவாலிஃபையர் போட்டியில் சென்னை சூப்பர் கிங்ஸ், டெல்லி கேபிடல்ஸ் அணிகள் மோதின. இதில் டாஸ் வென்ற சிஎஸ்கே முதலில் பந்துவீச்சைத் தேர்வு செய்தது.

முதலில் களமிறங்கிய டெல்லி கேபிடல்ஸ் அணி 20 ஓவர்கள் முடிவில் 172/5 ரன்கள் குவித்தது. அதிகபட்சமாக பிரித்வி ஷா 60 (34), ரிஷப் பந்த் 51 (35) ஆகியோர் ரன்களை குவித்தார்கள்.

இலக்கை துரத்திக் களமிறங்கிய சிஎஸ்கே அணியில் ஓபனர் ஃபாஃப் டூ பிளஸி 1 (2) வந்த வேகத்தில் நடையைக் கட்டினார். இதனைத் தொடர்ந்து உத்தப்பா களமிறங்கினார். இவர் தொடர்ந்து சொதப்பி வந்ததால், டெல்லிக்கு எதிராக தன்னை நிரூபிக்க வேண்டிய கட்டாயத்தில் இருந்தார்.

இதனால், உத்தப்பா மீது எதிர்பார்ப்பு இருந்தது. இந்த எதிர்பார்ப்புகளைப் பூர்த்தி செய்யும் வகையில்தான் அவர் விளையாடினார். ருதுராஜுடன் பார்ட்னர்ஷிப் அமைத்த உத்தப்பா, 44 பந்துகளில் 63 ரன்கள் குவித்து, அணியின் வெற்றிக்கு முக்கிய காரணமாக இருந்தார். இறுதியில், சிஎஸ்கே 19.4 ஓவர்களில் 173/6 ரன்கள் எடுத்து 4 விக்கெட்கள் வித்தியாசத்தில் வெற்றிபெற்றது.

இப்போட்டி முடிந்த பிறகு ராபின் உத்தப்பா பேட்டி கொடுத்தார். அதில், “அணிக்காக சிறந்த பங்களிப்பு வழங்கியது மகிழ்ச்சியளிக்கிறது. இன்று எனது மகனின் பிறந்த நாள். இதனை அவனுக்கு பரிசாகக் கொடுக்க விரும்புகிறேன்.

நான் களமிறங்கியபோது, நல்ல துவக்கம் தர வேண்டும் என்பதை உணர்ந்தேன். விளையாடும்போது உடலில் சில அசௌகரியங்களை உணர்ந்தேன். இருப்பினும், அது பெரிய பிரச்சினையை ஏற்படுத்தவில்லை.

இன்னும் 4 நாட்கள் இருக்கிறது. அதற்குள் இப்பிரச்சினைகள் காணாமல் போய்விடும். நான் முழு உடற் தகுதியுடன் களமிறங்குவேன் என்ற நம்பிக்கை இருக்கிறது. கொல்கத்தா நைட் ரைடர்ஸுக்கு பிறகு, சிஎஸ்கேவில்தான், அழுத்தங்கள் இல்லாமல் எனது போக்கில் விளையாடுகிறேன். நிர்வாகமும் அதற்கு தடையாக இல்லை” எனக் கூறினார்.

பேட்டிங் செய்தபோது ராபின் உத்தப்பா, உடல் அளவில் சில அசௌகரியங்களை சந்தித்தார். இதனால், ஆட்டம் இடையில் நிறுத்தப்பட்டது, உத்தப்பாவுக்கு தண்ணீர் போன்ற விஷயங்கள் கொடுக்கப்பட்டது.

இதனால், இறுதிப் போட்டிக்கு இவர் நல்ல உடற்தகுதியுடன் இருக்க மாட்டார். ரெய்னாவுக்கு வாய்ப்பு கிடைக்கும் என ரசிகர்கள் இணையத்தில் பதிவிட்டு வந்த நிலையில், உத்தப்பா கடைசி போட்டியில் களமிறங்க எந்த தடையும் இல்லை என்பதை தெளிவாகக் கூறிவிட்டார்.

இதனால், இந்த சீசனில் இனி அவரை களத்தில் பார்ப்பது கடினம். அடுத்த சீசனுக்கு முன் மெகா ஏலம் நடைபெறவுள்ளது. இதில் ரெய்னா ஏலம் போவதற்கு வாய்ப்பு குறைவு என்பதால், இனி அவரை ஐபிஎல் களத்தில் பார்ப்பது இயலாத காரியம் என கிரிக்கெட் விமர்சகர்கள் கருதுகிறார்கள்.

அண்மைய செய்திகள்

இதயும் பாருங்க